لا هاد مرتاح ولا غيرو احسن

عدد المساهمات : 8 تاريخ التسجيل : 28/04/2009

شبين من سوريا بالغربة :

قلو, يازلمة يالله شو مشتاق لسوريا ولحمص ..لك يلعن أبو الغربة شو صعبة .. لك مو مصدق ايمت انزل اجازة ع حمص..

رد التاني: لك اااااااااخ والله معك حق .. لك تضرب الساعة لي تركت فيها البلد واجيت .. قال شو بدي أمن مستقبلي وأخلص من العسكرية...

قلو الأول: لك مافي أحلى من بلدنا .. دخيل ترابا .. ودخيل الزحمة والناس والمشاكل.. بتتذكر شو كنا مبسوطين .. كيف كنا كل يوم باليل نروح و نقعد بالروضة و ع طرق شدة .. ونعمرها بعدين ببطاطا من الميماس او او شيش من كريش

رد قلو: ولا الشاورما عند عبودي ولا الشاطر حسن .. ولا البروستد عند ابو العوف... لك مشتهي فيق الصبح وحدا يقلي صباح الخير واشرب ميلو معو..

لك مافي ناس ما في بشر تحكي معها وتحس فيون ويحسو فيك..

الأول:ميلو شو وصباح شو.. لك اذا كان حظي حلو ممكن الهندي لي قاعد جنبي بالشغل يعبرني ويقلي كياليه (كيفك بالهندي)... طبعا مع شوية هز بالراس ومابتعرف اذا مبسوط ولا زعلان.. وهاد كلو بعد ساعتين سواقة بالزحمة...

التاني: المصيبة انو 90 بالمية من العالم بالبلد حاسدين الشباب هون .. ولما بتشكي لحدا بتاكول بهدلة على كيفك وبيقولولك انو انت نقاق ومو خرج بسط..

قلو الأول: لك تركها لـ الله .. مفكرين انو المغترب ..معمر بيت فوق بير بترول.. وعم يكش دبان ... لك يارجل..لما بنزل على سوريا بتنزل العالم فيني أسئلة : كيف الخليج ...أكيد مبسوط .. اوعى ترجع ها.. بشرفك دبرلي شغل..

ولما بقلون الشغل مو سهل والحياة صعبة كتير.. ماحد بيصدق وبيفكرو انو مابدي ساعدهون..

التاني: سيدي .. انت نزيل وانبسط والله يمرق هالخمس سنين على خير..

الأول : قولتك رح ينزلو مدة الأغتراب؟

التاني : والله في هيك إشاعة ..

الأول: والله اذا بتتطلع صح.. الك احلى عزيمة بالهافانا..

التاني:يااااااااااااااااارب.....

شبين من سوريا جوا سوريا:

الأول: لك الله يلعن أبو هالعيشة ...ماعاد فيني اتحمل.. زحمة وقرف وشغل بيهوي.. ومافي مصاري.. بدي سافر بأي طريقة ..بدي روح وشوف الدنيا وانبسط..

التاني: يا أخي نحنا بعمرنا مارح نتطور.. شوف وين صارت البشر .. ونحن وين.. لك شي بيطقق .. ولا شي ممكن يخليك مبسوط .. ماني مرتاح بالشغل أبدا .. مديري يقطع عمرو شو غليظ .. أغلظ من هيك مستحيل تلاقي .. مو شاطر الا بالنق...ومابعرف على شو حاطينو مدير .. ياسيدي حمار معبا ببنطلون..

الأول: ولا عنا نحنا.. الشغل بآخر الدنيا .. بدي شي ساعة لأوصل بالسرفيس.. هاد اذا لاقيت سرفيس.. وياريت راتب متل العالم والناس .. انا خلص استويت ولازم لاقي شغل بالخليج .. يا أخي الحياة هنيك غير ..بسط ومصاري وسيارات وبنات ... يعني بتعيش حياتك..

التاني: معك حق .. بتقضيلك 5 سنين وبترجع مليونير.. وياسيدي بلا ماترجع بيكون أحسن .

انا رفيقي واعدني انو يدبرلي شغل .. ويارب تظبط معي...

الأول : انا مقدم السي في تبعي عل الأنترنت ومو مخلي موقع يعتب عليي... ومبارح عملت انترفيو مع شركة بدبي.. وقال بيردولي خبر بهاليومين.. وشو ماعطوني رح اقبل.. لأنو اكيد بيكفي وزيادة..

التاني : الله يوفقك ... وتخلص من هالعيشة.....

الأول :آآآآآآآآآآآمين...

على رأي بقعة ضوء ... لا هاد مرتاح .. ولا غيرو أحسن .. كيف ما كنت بكون